टोकियो – आफ्नो हवाई क्षेत्रनजिक एकै पटक चिनियाँ र रुसी लडाकु विमान नजिक आएपछि जापानले आपत्ति जनाएको छ । टोकियोमा क्वाड शिखर बैठक चलिरहँदा चिनियाँ र रुसी विमान आफ्नो हवाई क्षेत्रनजिक आएको भन्दै जापानले आपत्ति जनाएको हो ।
त्यसलाई छेक्न जापानले पनि हतारहतार आफ्ना लडाकु विमान उडाएको थियो । यससम्बन्धी गम्भीर चासो रुस र चीन दुवैलाई कूटनीतिक माध्यमबाट पठाइसकिएको रक्षामन्त्री नोबुओ किसीले बताएका छन् ।
अमेरिकी राष्ट्रपति जो बाइडेन, भारतीय प्रधानमन्त्री नरेन्द्र मोदी र अस्ट्रेलियाका प्रधानमन्त्री एन्टोनी अल्बानिज टोकियोमा भएकै बेला रुस र चीनले उत्तेजना फैल्याउन यस्तो प्रयास गरेको उनको भनाई छ । ‘हामीलाई के विश्वास छ भने क्वाड शिखर बैठककै बेला यस्तो कार्य हुनु अरुबेलाभन्दा ज्यादा उक्साहटपूर्ण छ,’ मन्त्री किसीले भने ।
नोभेम्बरयता चौथो पटक यस्तो घटना हो । रुस र चीन दुवैले जापान र पूर्वी चीन सागरमा १३ घण्टा लामो संयुक्त हवाई गस्ती गरेको बताइन्छ । अर्कोतिर मंगलबार नै चार वटा चिनियाँ विमान आफ्नो हवाई प्रतिरक्षा क्षेत्रमा प्रवेश गरेको दक्षिण कोरियाले जनाएको छ ।
