टोकियो ।जापानमा क्रियाशिल् सामाजिक संघ-संस्था तथा संगठनले जापानको नेपाली समाजप्रति थप जिम्मेवार बन्ने प्रतिबद्धता ब्यक्त गरेका छन ।
पत्रकार महासंघ जापान शाखाले आइतबार टोकियोमा आयोजना गरेको एक अन्तरक्रिया कार्यक्रममा संघ संस्था तथा संगठनका जिम्मेवार ब्यक्तिहरुले यस्तो प्रतिबद्धता ब्यक्त गरेका हुन ।
“जापानमा सामाजिक संघ संस्थाहरुको बर्तमान अवस्था भविष्य तथा आपसी सहकार्य”बिषयमा पत्रकार महासंघ जापान शाखाले आयोजना गरेको उक्त कार्यक्रममा जापानमा क्रियाशिल् धेरै भन्दा धेरै संघ-संस्थाहरुको सहभागिता रहेको थियो ।
धेरैजसो सहभागिहरुले नेपाली समाजमा भएका समस्याहरु माथि ध्यानाकर्षण गराउदै सबै संस्थाहरुले समस्या समाधानका लागि आपसी सहकार्यमा जोड दिएका थिए ।
कार्यक्रममा बिशेषगरी धेरै सहभागिहरुले विधार्थीका समस्याहरु बढी भएको टिप्पणी गर्दै समस्या समाधानका लागि संस्थाहरुबीच आवश्यक सहकार्यका साथै सन्देशमुलक कार्यक्रमहरुको आयोजना गरिनुपर्नेमा जोडदिए ।
कार्यक्रमका प्रमुख अतिथि नेपाली दूतावासका कार्यबाहक राजदूत तथा उपनियोग प्रमुख अम्बिका जोशीले दूतावासले जापानवासी नेपालीका समस्या समाधानको लागि लागिपरेको बताउदै जापानका संघ संस्था संगको सहकार्यमा जोडदिनुभयो ।
“सबै सँग कमी कमजोरी हुन्छन दूतावासका पनि होलान तर हामी सुधार्दै जानेछौ।दूतावासको काम जापानका नेपालीको सेवा गर्ने नै हो,पछिल्लो समय हामी विधार्धीका समस्याप्रति गम्भिर छौ”जोशीले भन्नुभयो ।दूतावास सँग
ईमेल,फोन ,मोबाइल र फेसबुक मार्फत पनि सम्पर्क गर्न सकिने जानकारी पनि उहाले दिनुभयो ।
कार्यक्रममा पत्रकार महसंघका संस्थापक अध्यक्ष तिलक मल्ल ,एनआरएनए जापानका अध्यक्ष शिव प्रसाद पौडेल ,महासचिब सिद्धार्थ श्रेष्ठ लगायत अन्य संघ संस्था संगठनका प्रतिनिधिले पनि समसामयिक बिषयमा आ-आफ्ना धारणा राखेका थिए ।
कार्यक्रम जापानका पुर्व प्रधानमन्त्री स्वर्गिय शिन्जो आबेप्रति मौन धारण गरेर शुरु गरिएको थियो ।
