श्री एयरलाइन्सको जहाज धावन मार्गमा जाने क्रममा चिप्लिएको छ। त्रिभुवन अन्तराष्ट्रिय विमानस्थलबाट नेपालगञ्जका लागि उड्ने तयारीमा रहेको श्री एयरलाइन्सको नाइन एन ए एफ कल साइनको क्यू ४००-८ जहाज मंगलबार बिहान ९:३३ बजे पार्किङस्थलमै एउटा चक्का घाँसे क्षेत्रमा फस्न गएको हो।
त्रिभुवन विमानस्थलका प्रवक्ता रिञ्जी शेर्पाले जहाज ट्याक्सी वेबाट घाँसे मैदानमा पुग्न गएको अन्नपूर्णलाई जानकारी दिए। उनले भने,’ जहाजमा कुनै क्षति भएको छैन।जहाज धावनमार्गमा नगएकाले अरू उडान नियमित भइरहेको छ।’
जहाजमा चालकदलका ४ जनासहित ८० यात्रु थिए। यात्रुहरुलाई अर्को जहाजबाट नेपालगन्ज पठाउने तयारी भइरहेको विमानस्थल स्रोतले जनाएको छ।
