दोहा । कुवेतको सांस्कृतिक र मनोरञ्जन कार्यक्रममा नेपाली मौलिक संस्कृति झल्काउने सामग्रीको स्टल राखिएको छ ।
कुवेतको स्वतन्त्रता तथा अन्तर्राष्ट्रिय महिला दिवसको अवसरमा स्थानीय डीनरी अफ डिप्लोम्याटिक कोर्प्स र कूटनीतिक महिला समितिको संयुक्त तत्वावधानमा कुवेत सिटीमा आयोजित सांस्कृतिक र मनोरञ्जन कार्यक्रममा नेपाली स्टल राखिएको हो ।
नेपाली दूतावासले नेपाली मौलिक संस्कृति झल्काउने पोसाक, नेपाली खाना, नेपाली घरेलु उत्पादनका सामग्रीहरू, निर्यातयोग्य वस्तुहरू, पर्यटन प्रवर्द्धनसँग सम्बन्धित सामग्री सहितको स्टल राखी कार्यक्रममा सक्रिय सहभागिता जनाएको हो।
नेपालको सामाजिक-सांस्कृतिक विविधता र महत्त्व झल्काउने प्रचार सामग्री, हिमाल, पहाड लगायत पर्यटकीय महत्वका सामग्रीहरू, पोस्टर, ब्रोस्योर, हस्तकलाका सामग्री, नेपाली लोक बाजा आदिले सजाइएको थियो ।
दूतावासका अनुसार नेपाली स्टलको उल्लेख्य संख्यामा आगन्तुकहरूले भ्रमण गर्नुका साथै अभिरूची पूर्वक अवलोकन गरी नेपालका सांस्कृतिक विविधता, सम्पदा, पर्यटन र उत्पादनका सामग्रीबारे जिज्ञासा राखेका थिए ।
कुवेतका लागि नेपाली राजदूत दुर्गाप्रसाद भण्डारी, उनकी धर्मपत्नीसहित दूतावासका कर्मचारीहरूद्वारा अवलोकन कर्ताको जिज्ञासालाई संशोधन गर्दै नेपाल भ्रमणका लागि अनुरोध गरिएको थियो । नेपाली स्टलमा राखिएका नेपाली परम्परागत तथा लोकप्रिय खानाका परिकार मःमः, सेलरोटी, फुलौरा, बारा, पकौडा बारेमा आगन्तुकहरूले जानकारी लिनुका साथै रूचि देखाएका थिए ।
स्थानीय नेपाली कलाकारहरूले नेपाली लोक बाजा सहितको सांस्कृतिक प्रस्तुति एवं नेपाली पहिरनमा सजिएका कलाकारहरूको नेपाली गीत माथिको नृत्यलाई उपस्थित दर्शकहरूले प्रशंसा गरेका थिए ।
बसन्त ऋतुको आगमनसँगै मनोरञ्जनात्मक कार्यक्रम सहितको विशेष अवसरमा आयोजित प्रवर्द्धनात्मक कार्यक्रममा नेपाली दूतावासको सहभागिताले नेपालको पर्यटन क्षेत्र एवं सामाजिक-सांस्कृतिक वैभवता एवं विविधता लगायत केही हदसम्म नेपाली उत्पादनको स्थानीय बजारमा प्रचार-प्रसारमा सहयोग पुग्ने अपेक्षा छ ।
