अन्टारियो। क्यानाडा सरकारले अमेरिकी ‘एच–१बी’ भिसा भएकाहरुलाई क्यानाडा आएर काम गर्न सहज हुने गरी ‘ओमन वर्क–पर्मिट’ कार्यक्रम ल्याउने भएको छ।
उक्त कार्यक्रमबाट १० हजार अमेरिकी ‘एच–१बी’ भिसा भएकाहरुलाई क्यानाडा आएर काम गर्न अनुमति मिल्ने जनाइएको छ।
क्यानाडाका अध्यागमन मन्त्री सन फ्रेजरले मंगलबार यो कार्यक्रमबारे घोषणा गरेका हुन्।
‘रिफ्युजी एण्ड सिटिजनसिप’ मन्त्रालयले विज्ञप्ति जारी गर्दै उक्त कार्यक्रमअन्तर्गत ‘एच–१’ भिसा प्राप्त गरेकाहरुको परिवारका सदस्यलाई पनि अध्ययन वा काम गर्ने अनुमति प्रदान गरिने जनाएको छ।
२०२३ जुलाइ १६ सम्म अमेरिकाको ‘एच–१बी’ भिसा भएका र तिनका परिवारका सदस्यले क्यानाडा आउनका लागि आवेदन दिन सक्ने जनाइएको छ।
आवेदन स्वीकृत भएकाहरुलाई तीन वर्ष अवधिको ‘ओपन वर्क पर्मिट’ दिइने छ।
उनीहरुले क्यानाडाको कुनै पनि स्थानमा काम गर्न सक्ने उल्लेख गरिएको छ।
त्यसरी आउनेहरुको पति वा पत्नी र परिवारका आश्रित सदस्य आवश्यकताअनुसार अध्ययन अनुमतिका साथै अस्थायी बसोबासका लागि आवेदन दिन योग्य हुने जनाइएको छ।
यसैगरी, मन्त्री फ्रेजरले यो वर्षको अन्त्यसम्ममा सरकारले विश्वभरका सीपयुक्त प्रतिभाशाली व्यक्तिहरुलाई क्यानाडा आउन सहज हुने गरी अर्को एउटा कार्यक्रम तय गर्ने जनाएका छन्।प्रविधि क्षेत्रका कम्पनीमा काम गर्ने गरी उनीहरु आउन सक्ने जनाइएको छ।
यसअन्तर्गत को योग्य हुने वा कति संख्यामा आउन सक्ने भन्नेचाहिँ तत्काल खुलाइएको छैन।
एच–१बी’ भिसामार्फत् विदेशी नागरिकहरुलाई औद्योगिक क्षेत्रसहित केही विशेष व्यवसायहरुमा अस्थायी रुपमा अमेरिकामा काम गर्ने अनुमति दिइन्छ।
