चितवन । चितवनको भरतपुरमा गएराति हत्या गरिएका युवक एक वर्षअघि मात्रै जेलबाट छुटेको खुलेको छ।
एक वर्षअघि जेलबाट छुटेका उनको दुई पक्षबीचको झगडाका कारण धारिलो हतियार प्रहार गरेर हत्या भएको हो।
आइतवार साँझ साढे ७ बजे भरतपुर महानगरपालिका-१२ निवासी अनिल परियार ‘कान’ को धारिलो हतियारबाट हत्या गरिएको जिल्ला प्रहरी कार्यालय चितवनका प्रवक्ता डिएसपी नरहरि अधिकारीले बताए।
यसअघि आपराधिक कृयाकलापमा जोडिएका उनलाई त्यही पृष्ठभूमिका युवाहरूसँगको विवादका क्रममा आक्रमण भएको थियो।
अधिकारीका अनुसार हत्या भएका युवकविरुद्ध यसअघि ज्यान मार्ने उद्योगसहित अन्य अपराधमा पनि मुद्दा चलेको थियो।
‘यो घटना विशुद्ध आपराधिक पृष्ठभूमि जोडिएको देखिन्छ। यसमा कुनै राजनीतिक संलग्नता अहिलेसम्म पाएका छैनौँ’, अधिकारीले भने, ‘हामी अनुसन्धान गर्दैछौँ। ज्यान गुमाएका युवकको विगत पनि विवादित थियो। उनको हत्यामा पनि त्यही पृष्ठभूमिका व्यक्तिहरु संलग्न हुन सक्ने अनुमानसहित अनुसन्धान गरिरहेका छौँ।
आन्तरिक विवाद र लेनदेनका कारण हत्या भएको अनुमान प्रहरीले लगाएको छ। परियार एकजना भारतीय नागरिकसँग नजिक थिए। घटनामा तिनै भारतीयको संलग्नता रहेको अनुमान प्रहरीले अनुसन्धान थालेको छ।
भरतपुर–७ कृष्णपुर खेलमैदान अगाडि धारिलो हतियार प्रहार भएपछि उनको चितवन मेडिकल कलेजमा उपचारका क्रममा मृत्यु भएको हो।
घटनाको थप अनुसन्धान भइरहेको जिल्ला प्रहरी कार्यालय चितवनले जनाएको छ। परियार चितवन कारागारमै एक वर्ष सजाय काटेर छुटेका हुन्।
उक्त घटनापछि सोमबार बिहान भरतपुरका केही चोकमा टायर बालेर प्रदर्शन गरिएको छ।
भरतपुरको मिलनचोक र आस्था चोकमा टायर बालेर प्रदर्शन गर्दै घटनामा संलग्नमाथि कारबाही माग गरिएको छ। प्रहरीका अनुसार टायर बाल्ने समूह त्यहाँबाट हिँडिसकेको छ।
निर्वाचन नजिकिँदै गर्दा चितवनमा सुरक्षा चुनौती बढेको छ। पछिल्लो समय निर्वाचनसँग सम्बन्धित र अन्य आपराधिक कृयाकलापमा वृद्धि भएको छ।
