काठमाडौँ — प्रधानमन्त्री पुष्पकमल दाहाललाई नयाँ गठबन्धनमा सरकार सञ्चालन गर्न र शक्ति बाँडफाँट मिलाउन झन् सकस पर्नेदेखिएको छ । एमाले, राप्रपा र रास्वपाले छोडेका १६ मन्त्रालयको जिम्मेवारी एक्लै सम्हालिरहेका प्रधानमन्त्री दाहालले विश्वासको मतलिने र मन्त्रिपरिषद्लाई पूर्णता दिनेबारे छलफल थालेका छन् ।
रास्वपासहित अन्य दललाई समेत सरकारमा सहभागी गराउने उनको प्रयास छ, तर शक्ति बाँडफाँटको विषय नटुंगिँदा राष्ट्रपतिनिर्वाचनका लागि एक ठाउँमा उभिएका दलहरू नै को–को सरकारमा सहभागी हुने भन्ने प्रस्ट भइसकेको छैन ।
कांग्रेसले कम्तीमा आठ मन्त्रालयमा दाबी गरेको छ । जसपा, एकीकृत समाजवादी, लोसपा र नागरिक उन्मुक्तिले पनि ‘शक्ति र स्रोत’ भएका मन्त्रालयमा दाबी गरेका छन् । नयाँ गठबन्धनमा मन्त्रालयबारे औपचारिक छलफल नभए पनि कांग्रेस, माओवादी, जसपा, एकीकृत समाजवादी र लोसपाले अर्थ, गृह, परराष्ट्र, शिक्षा, भौतिक योजना, ऊर्जा, सहरी विकासलगायत मन्त्रालयमा दाबी पेसगरिसकेका छन् ।
गठबन्धनमा रहेका दलमध्ये हाल माओवादी र जनमत मात्रै सरकारमा छन् । उपराष्ट्रपति निर्वाचनपछि कांग्रेस, एकीकृत समाजवादी रजसपा पनि सरकारमा सामेल हुने तयारीमा छन् । अन्य साना दलले पनि महत्त्वपूर्ण भूमिकासहित सरकारमा सामेल हुन चाहेका छन् ।नेताहरूका अनुसार गठबन्धनमा प्रधानमन्त्री दाहाल, कांग्रेस सभापति शेरबहादुर देउवा र नेकपा एसका अध्यक्ष माधवकुमार नेपालबीचआलोपालो सरकारको नेतृत्व गर्ने समझदारी छ ।
