काठमाडौं । काठमाडौंको भृकुटीमण्डपमा दुई दिने ‘नेपाल लगानी सम्मेलन २०२२’ सम्पन्न भएको छ। जानकी ग्लोबल फाउन्डेसन र नेपाल फिलिपिन्स चेम्बर अफ कर्मशको आयोजनामा दुई दिनसम्म चलेको सम्मेलन भृकुटीमण्डपस्थित नेपाल पर्यटन बोर्डमा आइतबार सुरु भएको थियो ।
सम्मेलन सम्पन्न भएपछि राजधानीको नयाँ बानेश्वरमा पत्रकार सम्मेलन आयोजना गरी जानकी फाउन्डेसनले सम्मेलन पूर्ण रुपमा सफल र उपलब्धीपूर्ण भएको जनाएको छ । जानकी फाउन्डेसनकी अध्यक्ष जानकी गुरुङले सम्मेलनले नेपालमा लगानीको चेतना अभिवृद्धि र वित्तीय साक्षरता अभिवृद्धि गर्न सफल भएको बताइन । राष्ट्रिय तथा अन्तराष्ट्रिय लगानीकर्ताहरुलाई लगानीका उत्कृष्ट अवसरहरु खोजेर नेपालमा लगानी गर्न प्रोत्साहित गर्ने सम्मेलनको लक्ष्य रहेको थियो । सो लक्ष्यमा सम्मेलन सफल रहेको उनको दावी थियो ।
सफल नेपाली लगानीकर्ताका अनुभव र विचारहरूलाई प्रोत्साहित गर्न र नेपालमा लगानीको चेतना अभिवृद्धि र वित्तीय साक्षरता अभिवृद्धि गर्ने उद्देश्यले यो सम्मेलनको आयोजना गरिएको अध्यक्ष गुरुङको भनाई थियो ।
नेपालको राष्ट्रिय शक्ति आर्थिक विकासमा उच्च आर्थिक वृद्धिका लागि स्वदेशी पुँजीले मात्रै नपुग्ने जनाउँदै उनले विदेशको सार्वजनिक र निजी लगानी नेपाल भित्र्याउँदा लगानीको प्रत्याभूति हुन आवश्यक रहेकोमा समेत जोड दिइन्।
नेपाल ग्रिनइनर्जी पावरहाउस बन्न सक्ने बताउँदै अध्यक्ष गुरुङले स्वास्थ्य, शिक्षा तथा खेलकुदका पूर्वाधारमा समेत लगानीको सम्भावना रहेको बताइन्। यस्ता सम्मेलन नेपालमा लगानी भित्र्याउन कोसेढुंगा साबित हुने बताउँदै उनले नेपालको ऊर्जा, पर्यटन, पूर्वाधार, कृषि लगायतका क्षेत्रमा लगानीको अधिक सम्भावनाहरु रहेको उल्लेख गरिन ।
पत्रकार सम्मेलनमा अध्यक्ष गुरुङले अब हरेक वर्ष यो कार्यक्रम गरिने जानकारी पनि दिइन ।
