काठमाडौँ । सुन्धाराको सीटीसी मल लिलामीमा परेको छ। व्यवसायी इच्छाराज तामाङको सिभिल इस्टेट्स प्रा.लि.लाई सूचना कर्मचारी सञ्चय कोषले लिलामीमा राखेको हो।
सीटीसी मलको १३२ वटा पसल कबोल लिलामी बिक्रीका लागि सिलबन्दी बोलपत्र आह्वान गरिएको छ। सिभिल मल ६ रोपनी जग्गामा निर्माण भएको छ।
ठगी आरोपमा सिभिल ग्रुपका अध्यक्ष रहेका तामाङलाई गत असोज १८ मा नेपाल प्रहरीको केन्द्रीय अनुसन्धान ब्यूरो (सीआइबी) को टोलीले पक्राउ गरेको थियो।
उनी साढे ५ अर्ब बढी ठगीको आरोपमा पक्राउ परेका थिए। पूर्वसांसद समेत रहेका तामाङ र सिभिल सहकारीका वर्तमान अध्यक्ष केशवलाल श्रेष्ठलाई गत पुस १४ मा काठमाडौं जिल्ला अदालतले पुर्पक्षका लागि थुनामा पठाउन आदेश दिएको थियो।
काठमाडौं जिल्ला अदालतमा थुनछेकको बहसपछि यस्तो आदेश भएको थियो। करिब एक सातासम्म भएको बहस र प्रतिवादीसँग बयानपछि तामाङ र श्रेष्ठलाई थुनामा पठाउन आदेश दिएको अदालतले पक्राउ परेका १२ सहित ४२ जनालाई थुनामा पठाउने, साधारण तारेखमा छाड्ने वा धरौटीमा छाड्ने निर्णय दिएको थियो।
